بچپنا

کسی بچے کی مانند اس کی آنکھوں میں
شرارت تیرتی ہے یوں
کہ جیسے زندگی کے پانیوں پر اک
محبت کا پرندہ تیرتا ہو اور
اسے دو پل ٹھہر کر سانس لینے کو
مُیَسّر ہو نہ کوئی اک جزیرہ بھی
مگر وہ مسکراتی ہوں

انہی آنکھوں کے آنگن میں
کسی کو چاہنے کا اک تصوّر رقص کرتا ہو
کبھی رقصاں، کبھی ساکت
کبھی جھومے مسرّت میں
کبھی مبہوت رہ جائے
مگر اٹکھیلیاں کھیلے
محبت کے حسیں، اس نیلے آنگن میں
سیہ، روشن درختوں میں کہیں چُھپ کر
کہیں سے چاند کی صورت ذرا سی رونمائی کو
نکل آئے
دبا کر ہونٹ دانتوں میں
کہیں محبوب کو ڈھونڈے
اُسے پاکر پھر اس کی اور بڑھ جائے
مگر اُس کے پلٹنے سے بھی پہلے خود پلٹ جائے
درختوں میں کہیں چھپ کر
یہی اٹکھیلیاں کھیلے

اگر آنکھوں کے اس نیلے سمُندر پر
شرارت، تیرنے والی
جزیرے کے کہیں مٹتے ہوئے آثار بھی پالے
تو دم لینے کو اترے اور
اُسے یہ گیان حاصل ہو
کہ اُس کا بچپنا تو مُدتوں پہلے
خود اس نیلے سمُندر میں پھسل کر ڈوبتے لمحے
ذرا سا مسکرایا تھا
بھیانک خواب کی صورت

Bachpana

Kisi bachay ki maanind os ki aankhoN main
Shararat tairtii hay yuN
K jesay zindagi k paanioN par ik
Muhabbat ka parinda tairta ho aor
Osay do pal theher kar saans lenay ko
Muyassar ho na koi ik jazeera bhi
Magar wo muskurati hoN

Inhi aankhoN k aangan main
Kisi ko chaahnay ka ik tasawwur raqs karta ho
Kabhi raqsaaN, kabhi saakit
Kabhi jhoomay masarrat main
Kabhi mabhoot reh jaaye
Magar atkheliaaN khelay
Muhabbat k haseeN, is neelay aangan main
Siah, roshan darakhtoN main kaheeN chup kar
KaheeN say chaand ki soorat zara si ronumaayi ko
Nikal aaye
Daba kar hont daantoN main
KaheeN mahboob ko dhoonday
Osay paakar phir os ki aor baRh jaaye
Magar os k palatnay say bhi pehlay khud palat jaaye
DarakhtoN main kahein chup kar
Yahi atkheliaaN khelay

Agar aankhoN k is neelay samundar par
Shararat, tairnay wali
Jazeeray k kaheeN mit’tay hoe aasaar bhi paa lay
Tu dam lenay ko utray aor
Osay ye giyaan haasil ho
K os ka Bachpana tu muddatoN pehlay
Khud is neelay samundar main phisal kar doobtay lamhay
Zara sa muskuraya tha
Bhayanak khwaab ki soorat!